ആരംഭം

ടിം ബര്‍നേഴ്സ് ലീയുടെ ഇന്റര്‍നെറ്റ്‌ ലോകത്ത്‌ യാഹൂവിന്റെ അപ്രമാദിത്യ കാലഘട്ടം മുതല്‍ക്ക്‌ പിച്ച വെച്ച് തുടങ്ങിയതാണ്. പിന്നീട് ജിമെയിലും ഓര്‍കുട്ടും കഴിഞ്ഞു സക്കര്‍ബര്‍ഗിന്റെ ഫേയ്സ്ബുക്ക് വരെ നീളുന്ന അതിന്റെ യാത്രയില്‍ വളരെ സജീവമായി അതില്‍ നില നില്‍ക്കുന്നുന്ടെന്കിലും 'ബ്ലോഗുകള്‍ ' എന്ന 'ബൂലോകത്ത്' ഇത് വരെ കൃത്യമായ സാന്നിധ്യം അറിയിക്കാന്‍ കഴിഞ്ഞിരുന്നില്ല. എഴുതാനുള്ള മടി കൊണ്ടോ, എഴുത്ത് വഴങ്ങില്ല എന്ന 'തിരിച്ചറിവ്' കൊണ്ടോ ആയിരിക്കണം ഇതിനോട് എന്നും ഒരു വിമുഖത പുലര്‍ത്താനുള്ള കാരണം. (ഇംഗ്ലീഷില്‍ നാലു പോസ്റ്റുകള്‍ ഇട്ടു നിര്‍ത്തിയ ഒരു ചെറിയ ബ്ലോഗ്‌ അതിന്ന്‍ അപവാദമാണ്!).

ആദ്യത്തെ ബ്ലോഗ്‌ സ്വയം പരിചയപ്പെടുത്തി കൊണ്ടാകണം എന്നൊരു അലിഖിത നിയമം ഉള്ളതിനാല്‍ അതില്‍ നിന്ന് തന്നെ തുടങ്ങാം. പേര് 'അഫ്താബ്'; 'ആഫ്താബ്‌' എന്നതാണ് ശരിയായ് ശബ്ദം എന്ന് പറയുന്നവരുമുണ്ട്. ഉര്‍ദുവില്‍ ഉച്ചാരണം അങ്ങനെ തന്നെയാണ് എന്നതാണ് സത്യവും. പക്ഷെ കേള്‍ക്കാനിഷ്ടം 'അഫ്താബ്' ആയതിനാല്‍ എല്ലാവരോടും അങ്ങനെയാണ് പറയാറ് :) കോഴിക്കോട് ജില്ലയിലെ കൊടിയത്തൂര്‍ ആണ് പ്രദേശം.(കണ്ണഞ്ചേരി എന്നത് കുടുംബ പേരാണ്) ഈ ഭൂമിയിലേക്ക് ജനിച്ചു വീണിട്ട് ഏതാണ്ട് 28 വര്‍ഷമായി. ഉറവിടമാന്വേഷിക്കാതെ തീന്‍ മേശയിലെ ഭക്ഷണം കഴിച്ചു നിര്‍വൃതിയോടെ പുറത്തു പോകുന്ന ഒരു കൗമാര പ്രായക്കാരനെ പോലെ ആയിരുന്നു കഴിഞ്ഞു മൂന്ന് നാല് വര്ഷം മുന്‍പ് വരെ ജീവിതം. അതിന്റെ പിന്നിലെ തന്റെ രക്ഷിതാവിന്റെ വിയര്‍പ്പും കാരുണ്യവും ഉണ്ടെന്നു തിരിച്ചറിയാതെയുള്ള ഓട്ടം. ഈ ലോകത്തിന്റെ വിഭവങ്ങളെ, അതൊരുക്കി തന്നവനെ മറന്നു ആസ്വദിച്ചിരുന്ന ഒരു കാലഘട്ടം. അറിയാഞ്ഞിട്ടായിരുന്നോ അതോ ചിന്തിക്കാഞ്ഞിട്ടായിരുന്നോ എന്ന് അറിയില്ല. ഇന്ന് വെള്ളവും, ജീവനും, വായുവും, സുഖവും, ദുഖവും എല്ലാം തന്ന ആ സൃഷ്ടാവിനെയും അവനെ പരിചയപ്പെടുത്തിയ അവന്റെ ദൂതനെയും (സ) സ്നേഹിച്ചു കൊണ്ട് അവന്റെ വിധി വിലക്കുകള്‍ ജീവിതത്തില്‍ പകര്‍ത്താന്‍ പരമാവധി ശ്രമിച്ചു കൊണ്ട് ജീവിതത്തിന്റെ യദാര്‍ത്ഥ സമാധാനം കണ്ടെത്താന്‍ ശ്രമിക്കുന്നു.

എന്റെ നിരീക്ഷണത്തിലൂടെയും വായനയിലൂടെയും ചിന്തയിലൂടെയും ഞാന്‍ കണ്ടെത്തിയ അറിവുകളും ആശയങ്ങളും പങ്കു വെക്കുക എന്നതാണ് ഈ ബ്ലോഗിന്റെ പിന്നിലുള്ള ലക്‌ഷ്യം. എന്റെ തിരിച്ചറിവുകള്‍ ആരുടെയെങ്കിലും മേലെ അടിച്ചേല്‍പ്പിക്കുക എന്നത് ഒരിക്കലും എന്റെ ലക്ഷ്യമല്ല. മനസ്സിലെ ആശയങ്ങളെ അക്ഷരങ്ങളിലേക്ക് പകര്‍ന്ന് മനസ്സിന്റെ വാതായനങ്ങള്‍ വീണ്ടുമൊരു പഠനത്തിനു വേണ്ടിയും തിരുത്തലുകള്‍ക്ക് വേണ്ടിയും നിങ്ങള്‍ക്ക് മുന്നില്‍ തുറന്നിടുന്നു എന്ന് മാത്രം. തീര്‍ച്ചയായും നിങ്ങള്‍ക്ക് വിയോജിക്കാം, വിമര്‍ശിക്കാം. അത്തരം വിമര്‍ശനങ്ങള്‍ എന്റെ അന്വേഷണങ്ങളെ കൂടുതല്‍ വിപുലപ്പെടുത്തുമെന്ന പ്രതീക്ഷയോടെ നിങ്ങള്ക്ക് മുന്നില്‍ സമര്‍പ്പിക്കുന്നു.